સુરત કોંગ્રેસના ઉમેદવાર નિલેશ કુંભાણીનું ફોર્મ રદ થઈ ગયું છે. ત્યારે હવે આ મામલે કોંગ્રેસ હાઈકોર્ટના દ્વાર ખખડાવશેની માહિતી મળી રહી છે. નિલશ કુંભાણીની ઉમેદવારી રદ થવા અંગે શક્તિસિંહ ગોહિલે ભાજપ પર આક્ષેપ કર્યાં છે. તેમણે કહ્યું છે કે, કાયદાની જોગવાઈ મુજબ જો ઉમેદવારી પત્રમાં ટેકેદારની સહી ના હોય તો, ઉમેદવારી રદ થાય. ટેકેદાર ફોર્મ ભરાઈ ગયા બાદ કહે કે મારી સહી નથી તો ફોર્મ રદ ના થાય.
મળતી માહિતી મુજબ કોંગ્રેસ ઉમેદવાર નિલેશ કુંભાણીનું એક દિવસના હાઈ વોલ્ટેજ ડ્રામા બાદ આખરે ફોર્મ રદ કરવામાં આવ્યું છે. જેમાં ટેકેદારોની સહિ ખોટી હોવાનો આરોપ હતો ત્યારે આજે તમામ ટેકેદારો સાથે કુંભાણીને હાજર રહેવા જણાવવામાં આવ્યું હતુ ત્યારે હવે એકપણ ટેકેદારનો અતોપતો મળ્યો ન હતો અને એકપણ ટેકેદાર હાજર ન રહેતા આખરે ફોર્મને રદ કરવામાં આવ્યું હતુ
આ સમગ્ર મામલે શક્તિસિંહે ભૂતકાળનો દાખલો ટાંકિને કહ્યું હતું કે, 2012ની વિધાનસભાની ચૂંટણીમાં પણ આવી જ સ્થિતિ સર્જાઈ હતી. 2012માં સુરત પૂર્વમાં આવી સ્થિતિ સર્જાઈ હતી તે સમયે આપેલો નિર્ણય અને હાલમાં આપેલ નિર્ણય બન્ને અલગ અલગ છે. એક જ બાબતે બે અલગ અલગ ઉમેદવારો માટે અલગ અલગ નિર્ણય કેવી રીતે હોઈ શકે. ચૂંટણી પંચને વિનંતી કરુ છુ કે નિષ્પક્ષ ચૂંટણી કરાવો.
શક્તિસિંહે કહ્યું છે કે, ફોર્મમાં અને અરજીમાં કરાયેલ ટેકેદારની સહીને FSL માં મોકલીને તેની સત્યતા ચકાસવી જોઈએ. બંનેમાં થયેલ સહી એક જ વ્યક્તિઓની છે કે કેમ તે પણ ચકાસવું જોઈએ. ભાજપના ડરાવવાથી ટેકેદારો ફરી ગયા છે. ફોર્મ રદ્દ કરવાની જોગવાઈ કાયદામાં નથી
આ મામલે કોંગ્રેસ હવે હાઈકોર્ટના દ્રાર ખખડાવશે . કોંગ્રેસની લીગલ ટીમ હાઇકોર્ટના જશે ત્યાં પીટીશન દાખલ કરવામાં આવશે. ત્યારે જોવાનું રહેશે કે ગુજરાત હાઇકોર્ટમાં ઇલેક્શન પીટીશન ક્યારે કોંગ્રેસ દ્વારા દાખલ કરવામાં આવે છે. ઇલેક્શન પીટીશનનો ડ્રાફ્ટ તૈયાર કરવા સૂચના અપાઈ છે
