બેંગ્લોર. મળતી માહિતી પ્રમાણે કર્ણાટક બીજેપી માનહાનિ કેસમાં કોંગ્રેસ નેતા રાહુલ ગાંધી શુક્રવારે સ્પેશિયલ કોર્ટમાં હાજર થયા હતા. અહીં કોર્ટે તેમને જામીન આપ્યા હતા. વાસ્તવમાં રાહુલ પર અખબારોમાં બદનક્ષીભરી જાહેરાતો આપવાનો આરોપ છે. તેમજ ગયા વર્ષે રાજ્યની ચૂંટણી પહેલા આપવામાં આવેલી એક જાહેરાતમાં રાજ્યની તત્કાલિન ભાજપ સરકાર પર 2019-2023 દરમિયાન મોટા પાયે ભ્રષ્ટાચાર આચરવાનો આરોપ મૂકવામાં આવ્યો હતો.
રાહુલ ગાંધીના કેસ મુજબ કર્ણાટકમાં ગયા વર્ષે વિધાનસભાની ચૂંટણી યોજાઈ હતી. આ દરમિયાન કોંગ્રેસે તત્કાલીન ભાજપ સરકાર પર 2019-2023ના શાસન દરમિયાન મોટા પાયે ભ્રષ્ટાચાર આચરવાનો આરોપ લગાવ્યો હતો. જે બાદ કર્ણાટક ભાજપે કોંગ્રેસ નેતા રાહુલ ગાંધી, મુખ્યમંત્રી સિદ્ધારમૈયા અને ઉપમુખ્યમંત્રી ડીકે શિવકુમાર વિરુદ્ધ માનહાનિનો કેસ દાખલ કર્યો હતો.
રાહુલ ગાંધી પર આરોપ છે કે કોંગ્રેસના આ નેતાઓએ તત્કાલિન મુખ્યમંત્રી બસવરાજ બોમાઈ સહિત ભાજપના નેતાઓ વિરુદ્ધ અગ્રણી અખબારોમાં ખોટી જાહેરાતો આપી હતી. કોંગ્રેસે તમામ જાહેર કામોમાં 40 ટકા કમિશન લેવામાં આવે છે તેવો આક્ષેપ કરીને ‘કરપ્શન રેટ કાર્ડ’ પણ પ્રકાશિત કર્યું હતું. તે જ સમયે, રાહુલ ગાંધીએ તેમના સોશિયલ મીડિયા એકાઉન્ટ X પર એક અપમાનજનક જાહેરાત પણ પોસ્ટ કરી હતી. વિશેષ અદાલતે આ કેસમાં સિદ્ધારમૈયા અને શિવકુમારને 1 જૂનના રોજ જામીન આપ્યા હતા.
