રાજ્યમાં હવામાન વિભાગની આગાહીને પગલે ધોધમાર વરસાદ વરસી રહ્યો છે. ત્યારે આગામી ત્રણ કલાકમાં રાજ્યના અનેક જિલ્લામાં ભારેથી અતિભારે વરસાદ પડી શકે છે. હવામાન વિભાગે નાઉકાસ્ટ જાહેર કર્યું છે જેમાં આગામી ત્રણ કલાક માટે ક્યાં કેવો વરસાદ પડશે તેની આગાહી કરવામાં આવી છે.
રાજ્યમાં સાર્વત્રિક વરસાદ વરસી રહ્યો છે ગઈકાલે સૌરાષ્ટ્રમાં સપાટો બોલાવ્યાં બાદ આજે વહેલી સવારથી જ દક્ષિણ ગુજરાતમાં મેઘરાજા જમાવટ બોલાવી રહ્યા છે. નવસારી, વલસાડ, ઉમરગામમાં ધોધમાર વરસાદ વરસી રહ્યો છે. જેને પગલે રોડ રસ્તા પર પાણી ભરાઈ ગયા હતા. મરોલી અને સચિન રેલવે સ્ટેશનની વચ્ચે પતરા ઉડીને રેલવે ટ્રેક પર પડતા રેલ વ્યવહાર ખોરવાયો હતો. તો જૂનાગઢમાં મોડી રાત્રે વરસાદી કહેર જોવા મળ્યો હતો, છેલ્લા 24 કલાકમાં રાજ્યના 217 તાલુકામાં વરસાદ નોંધાયો છે. જેમાં સૌથી વધુ વંથલીમાં 14 ઈંચ, વિસાવદરમાં 13 ઈંચ વરસાદ વરસ્યો હતો. ત્યારે આજે પણ રાજ્યના અનેક જિલ્લામાં વરસાદની શક્યતા છે.
આજે ક્યા ક્યા જિલ્લામાં પડશે વરસાદ
બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, પંચમહાલ, દાહોદ, મહિસાગર, વડોદરા, છોટા ઉદેપુર, નર્મદા, ભરૂચ, સુરતા, ડાંગ, તાપી, નવસારી, વલસાડ અને દમણ, દાદરા નગર હવેલી તેમજ સૌરાષ્ટ્રના સુરેન્દ્રનગર, રાજકોટ, જામનગર, પોરબંદર, જૂનાગઢ, અમરેલી, ભાવનગર, મોરબી, દ્વારકા, ગીર સોમનાથ, બોટાદ, કચ્છ અને દિવમાં વરસાદની શક્યતા છે.