ઇન્ડોનેશિયાના સુલાવેસી ટાપુ પર કેટલાક દિવસોથી પડી રહેલા ભારે વરસાદને કારણે એક મોટી દુર્ઘટના સામે આવી છે. અહીં સુલાવેસી ટાપુ પર, મુશળધાર વરસાદને કારણે ગેરકાયદેસર સોનાની ખાણમાં ભૂસ્ખલન થયું. ભૂસ્ખલનને કારણે ઓછામાં ઓછા 12 લોકોના મોત થયા છે. જ્યારે 18 લોકો હાલમાં બિનહિસાબી છે.
સ્થાનિક બચાવ એજન્સી બસર્નાસના વડા હેરિયાંતોએ જણાવ્યું હતું કે, રવિવારે સવારે ગોરોન્ટાલો પ્રાંતના સુમાવા જિલ્લામાં ભૂસ્ખલનમાં ગેરકાયદે ખાણની નજીક રહેતા ખાણિયાઓ અને રહેવાસીઓ માર્યા ગયા હતા. તેમણે એ પણ માહિતી આપી હતી કે અકસ્માતમાં માટી નીચે દટાયેલા પાંચ લોકોને સુરક્ષિત બહાર કાઢવામાં આવ્યા છે. જોકે, રેસ્ક્યુ ટીમ સોમવારે ગુમ થયેલા 18 લોકોને શોધી રહી હતી.
હરિયાંતોએ જણાવ્યું હતું કે, ગુમ થયેલા લોકોને શોધવા માટે અમે રાષ્ટ્રીય બચાવ દળ, પોલીસ અને લશ્કરી કર્મચારીઓ સહિત 164 જવાનોને તૈનાત કર્યા છે. તે જ સમયે, બચાવકર્મીઓએ ભૂસ્ખલન સ્થળ સુધી પહોંચવા માટે લગભગ 20 કિલોમીટર એટલે કે 12.43 માઈલનું અંતર કાપવું પડશે. અહીં રસ્તા પર કાદવ અને સતત વરસાદના કારણે બચાવ કામગીરીમાં મુશ્કેલીનો સામનો કરવો પડી રહ્યો છે.
તેમણે કહ્યું કે જો શક્ય હશે તો તે લોકોને બચાવવા માટે એક્સેવેટરનો પણ ઉપયોગ કરશે. એજન્સીના જણાવ્યા પ્રમાણે ભૂસ્ખલનના કારણે કેટલાક મકાનો પણ ધ્વસ્ત થઈ ગયા છે. ઇન્ડોનેશિયાની ડિઝાસ્ટર એજન્સી (BNPB) એ જણાવ્યું હતું કે ભૂસ્ખલનથી ઘણા મકાનો અને પુલને નુકસાન થયું છે. તેણે રહેવાસીઓને ચેતવણી આપી હતી કે સોમવાર અને મંગળવારે ગોરોન્ટાલો પ્રાંતના કેટલાક વિસ્તારોમાં હજુ પણ વરસાદ પડી શકે છે અને લોકોને સાવચેત રહેવા જણાવ્યું હતું.
