Manali Flood: હિમાચલ પ્રદેશમાં વરસાદે ફરી એકવાર તારાજી સર્જી છે. આ વખતે મનાલીમાં વરસાદને કારણે ભારે નુકસાન થયું છે. મનાલીમાં બુધવારે મધરાતે વાદળ ફાટવાને કારણે અંજની મહાદેવ નદી અને અખારી નાળા છલકાઈ ગયા હતા. પૂરના કારણે લોકોમાં ભયનો માહોલ જોવા મળ્યો હતો. અવાજ સાંભળીને પલચન, રૂઆડ અને કુલંગ ગામના લોકો ઘરની બહાર આવી ગયા હતા. બિયાસ નદી એકાએક તોફાની બની હતી. નદીમાંથી આવતા ભયંકર અવાજથી બધા ગભરાઈ ગયા. પલચનમાં વાદળ ફાટવાથી આવેલા પૂરના કારણે બે મકાનો ધોવાઈ ગયા છે. વાદળ ફાટવાને કારણે લેહ મનાલી હાઈવેને પણ નુકસાન થયું છે. લેહ મનાલી હાઈવે પર બનેલા પુલ પર મોટા પથ્થરો પડી ગયા છે.
પૂરના કારણે બે મકાનો પ્રભાવિત થયા છે. આ મકાનોમાં રહેતા લોકોએ ભાગીને પોતાનો જીવ બચાવ્યો હતો. હાલ મનાલી પ્રશાસન રાહત કાર્યમાં લાગેલું છે. વહીવટીતંત્ર પણ નુકસાનનું આકલન કરી રહ્યું છે. જેમના ઘરોને નુકસાન થયું છે તેમાં ધની રામ અને ખીમી દેવીનો સમાવેશ થાય છે. પુલ અને પાવર પ્રોજેક્ટને પણ પૂરને કારણે નુકસાન થયું છે.
અધિકારીઓના જણાવ્યા અનુસાર, મનાલી વિસ્તારમાં અંજની મહાદેવ નાળામાં વાદળ ફાટવાને કારણે NH-3 પર ધુંડી અને પાલચન પુલ વચ્ચેનો પટ પ્રભાવિત થયો છે. લાહૌલ અને સ્પીતિ પોલીસે ગુરુવારે એક એડવાઈઝરી જારી કરીને કહ્યું કે અટલ ટનલના ઉત્તરી દરવાજાથી લાહૌલ અને સ્પીતિથી મનાલી જતા વાહનોને રોહતાંગ તરફ વાળવામાં આવ્યા છે. મુસાફરોને પણ જરૂરી હોય ત્યારે જ મુસાફરી કરવા, સાવચેતીપૂર્વક વાહન ચલાવવા અને રસ્તામાં સંભવિત જોખમોથી વાકેફ રહેવા માટે પણ કહેવામાં આવ્યું હતું.
બુધવારે રાત્રે રાજ્યમાં કુલ 15 રસ્તાઓ ટ્રાફિક માટે બંધ કરવામાં આવ્યા હતા, જેમાં મંડીમાં 12, કિન્નૌરમાં બે અને કાંગડા જિલ્લામાં એકનો સમાવેશ થાય છે, એમ સ્ટેટ ઇમરજન્સી ઓપરેશન સેન્ટરે જણાવ્યું હતું. આ ઘટનામાં પાવર પ્રોજેક્ટ અને કેટલાક મકાનોને નુકસાન થયાના અહેવાલ છે, પરંતુ તેની પુષ્ટિ થઈ નથી. સ્થાનિક હવામાન વિભાગે બુધવારે હિમાચલ પ્રદેશમાં વિવિધ સ્થળોએ આગામી ચાર દિવસ એટલે કે 28 જુલાઈ સુધી ભારે વરસાદની ‘પીળી’ ચેતવણી જારી કરી છે. ઇમરજન્સી ઓપરેશન સેન્ટરે જણાવ્યું હતું કે 27 જૂને ચોમાસાના આગમનથી રાજ્યમાં વરસાદ સંબંધિત ઘટનાઓમાં કુલ 49 લોકોના મોત થયા છે. ઘરોમાં રહેતા લોકો પોતાનો જીવ બચાવવા દોડ્યા પરંતુ ઘરો પૂરની ઝપેટમાં આવી ગયા. પલચન અને સોલાંગ પાસે સ્નો ગેલેરીમાં કાટમાળના કારણે મનાલી લેહ રોડ પણ બંધ કરી દેવામાં આવ્યો છે.
