સલમાન ખાનના ઘરની બહાર ફાયરિંગ કેસમાં મોટું અપડેટ સામે આવ્યું છે. આ કેસમાં સલમાન ખાન અને તેના ભાઈ અરબાઝ ખાને મુંબઈ પોલીસ સમક્ષ પોતાનું નિવેદન નોંધ્યું છે. 14 એપ્રિલે બાઇક સવાર છોકરાઓએ સલમાનના ઘર ગેલેક્સી એપાર્ટમેન્ટમાં ગોળીબાર કર્યો હતો. આ પછી બંને ફરાર થઈ ગયા હતા. બંદૂકમાંથી નીકળેલી ગોળી સલમાનના એપાર્ટમેન્ટની અંદર પહોંચી ગઈ હતી. મુંબઈ પોલીસ આ મામલે સતત તપાસ કરી રહી છે.
આ કેસમાં બંને બાઇક સવારોની મુંબઈ પોલીસની ક્રાઈમ બ્રાન્ચે ધરપકડ કરી હતી. તેમને હથિયાર આપનાર વ્યક્તિ પણ પોલીસના હાથે ઝડપાઈ ગયો હતો. આ ફાયરિંગનું કનેક્શન ગેંગસ્ટર લોરેન્સ બિશ્નોઈ સાથે હોવાનું કહેવાય છે. હવે સલમાન ખાને જણાવ્યું છે કે ફાયરિંગના દિવસે શું થયું હતું.
4 જૂને બપોરે 12 વાગ્યાની આસપાસ ક્રાઈમ બ્રાન્ચના ચાર અધિકારીઓ સલમાન ખાનનું નિવેદન લેવા તેના ઘરે પહોંચ્યા હતા. સલમાન ખાનનું નિવેદન નોંધવામાં તેમને લગભગ ત્રણથી ચાર કલાકનો સમય લાગ્યો હતો. અરબાઝ ખાનનું નિવેદન નોંધવામાં બે કલાકનો સમય લાગ્યો હતો. ક્રાઈમ બ્રાંચની ટીમ સલમાનનું નિવેદન નોંધ્યા બાદ સાંજે 5.30 વાગ્યા પછી તેના ઘરેથી નીકળી હતી.
અરબાઝ ખાનનું નિવેદન 4 પેજમાં જ્યારે સલમાન ખાનનું નિવેદન 9 પેજમાં રેકોર્ડ કરવામાં આવ્યું હતું. મળતી માહિતી મુજબ, સલમાને પોલીસને આપેલા પોતાના નિવેદનમાં જણાવ્યું કે ઘટનાની રાત્રે તેના ઘરે એક પાર્ટી હતી, જેના કારણે તે મોડા સૂઈ ગયો અને સવારે ગોળીબારનો અવાજ સાંભળીને જાગી ગયો.
સલમાન ખાન ફાયરિંગ કેસમાં અત્યાર સુધી મુંબઈ પોલીસની ક્રાઈમ બ્રાન્ચે કુલ 29 લોકોના નિવેદન નોંધ્યા છે. ઘટના સમયે સલમાન ખાનના પિતા સલીમ ખાન ઘરે હાજર હતા. જોકે વૃદ્ધાવસ્થાના કારણે તેમનું નિવેદન નોંધવામાં આવ્યું ન હતું. એક વરિષ્ઠ પોલીસ અધિકારીએ કહ્યું કે જો જરૂર પડશે તો સલીમ ખાનનું નિવેદન નોંધવામાં આવશે. પોલીસ અધિકારીએ એમ પણ કહ્યું કે મુખ્ય આરોપી લોરેન્સ બિશ્નોઈને સાબરમતી જેલમાંથી કસ્ટડીમાં લેવાની પ્રક્રિયા ટૂંક સમયમાં શરૂ થશે.
14 એપ્રિલે સવારે 4:52 કલાકે બે બાઇક સવાર શૂટરોએ સલમાન ખાનના ઘર ગેલેક્સી એપાર્ટમેન્ટ પર 5 રાઉન્ડ ફાયરિંગ કર્યું હતું. તેમાંથી એક ગોળી સલમાનના ઘરની દિવાલ પર વાગી હતી, જ્યારે એક ગોળી ત્યાં લગાવેલી નેટને વીંધીને સલમાનના ઘરની અંદરના ડ્રોઇંગ રૂમની દિવાલ પર વાગી હતી. આ પછી આરોપીઓ તેમની બાઇક એક ચર્ચ પાસે છોડીને ભાગી ગયા હતા.
પોલીસે આ બે શૂટર્સ વિકી ગુપ્તા (24 વર્ષ) અને સાગર પાલની ગુજરાતના ભુજમાંથી ધરપકડ કરી હતી. થોડા સમય પહેલા આ મામલે મોટો વળાંક આવ્યો હતો. પંજાબમાંથી ધરપકડ કરાયેલ અનુજ થાપને પોલીસ કસ્ટડીમાં કથિત રીતે આત્મહત્યા કરી લીધી હતી. મળતી માહિતી મુજબ, અનુજ લોરેન્સ બિશ્નોઈ ગેંગના સંપર્કમાં હતો. તે ટ્રક હેલ્પર તરીકે કામ કરે છે. મુંબઈ ક્રાઈમ બ્રાન્ચે સુરતની તાપી નદીમાંથી એક પિસ્તોલ અને કેટલાક જીવતા કારતૂસ મળી આવ્યા હતા.
બ્રાન્ચનો દાવો છે કે આ એ જ હથિયારો હતા જેનો ઉપયોગ 14 એપ્રિલે સલમાન ખાનના ઘરે ફાયરિંગ માટે કરવામાં આવ્યો હતો. પોલીસના જણાવ્યા અનુસાર આ હથિયારો અનુજ અને સુભાષ દ્વારા સપ્લાય કરવામાં આવ્યા હતા. અનુજ અને સુભાષે 15 માર્ચે ગોળીબાર કરનાર આરોપી વિકી અને સાગરને દેશી બનાવટની બે પિસ્તોલ અને કારતુસ આપ્યા હતા.
4 મે, 2024ના રોજ, મૃતક અનુજ થાપનના પરિવાર વતી મુંબઈ હાઈકોર્ટમાં એક રિટ દાખલ કરવામાં આવી હતી. જેમાં મૃતક અનુજ થપનના પરિવારે હાઈકોર્ટમાં સલમાન ખાન વિરુદ્ધ કાર્યવાહીની માંગ કરી છે. એટલું જ નહીં મૃતકના પરિવારે આ મામલે સીબીઆઈ તપાસની માંગ પણ કરી છે. થાપનના પરિવારજનો અને વકીલોનો આરોપ છે કે તે આત્મહત્યા નથી, પરંતુ અનુજના મૃત્યુ પાછળ કોઈ કાવતરું છે, જેની સીબીઆઈ દ્વારા તપાસ થવી જોઈએ.
